User:Puzomedia/sandbox
ZO tate vannuoi!
Ih tapa vuh Tg Khup Deih Khuol kithana tungtangin, Tonzang ah buoina lienpi piengzo aa, kamkhiel haamkhiel zong online tung ah tampi kiza kawikawi ta mawh ahiman in a koimapo in tammi lai hoitah in simciet in, pilvangtah in kihenem ciet vai ci’n Global Zo Organization(GZO) pan kang thuum masa vuh hi. Tuazieh in, Zo Innkuon(Tonzang) leh Zo Khangno Kipawlna(ZKK-Tonzang) pan a sepna teng vuh leh minam vai ahilona tungtangin a nei bangin kang zasah sawn vuh hi.
1. Tg Khup Dei Khuol that teng pen nu le pate sapna mang ngailo aa, Nu le pa te nitenn puonsil zong a haltum pieh ngam te ahi vuh hi. 2. Tammi kithana tungtangin Zo Innkuon(Tonzang) le ZKK(Tonzang) te muna ah a nuasang pan in gamtat siet na dingin a “Tawsawn” koima omlo hi. 3. “Sanga tung a lungkim koi om ding a hei” a ci ma bangin, Zo le Sim sung ah tammi thu zieh in a lungkim ki omlo aa, a cizalo koima omlo hi. 4. Mi thatte del dingin ZKK(Tonzang) in Khangno mi-50 bang kikhen pai vuh aa, Motor Cycle sathau thunpieh in Gamlai-Lezang-Anlangh lam del leh Nahzang-Muolkawi-Tuikhieng lam del ciet pai vuh hi. 5. 24.7.2014 in Tg Khup Dei Khuol thatte i, nu le pa te in lutna nei kia vuh aa, "Ka tate vuh gamtat sietna pen Kumpi khensatna bangbangin ka lungkim ding vuh hi." ci vuh hi. Hitama leh ei lam pan in zong lutna pen san thei om tuonlo in a Voh vuh kinua kai sah kia ta hi. 6. Tg Khup Dei Khuol luonghawm kivui masangin ZO KIKUPNA kinei aa, mipi thukimna dungzui in a nei a bangin Pu Thang Cin Lien in thusunna nei hi.
Tg Khup Dei Khuol Kithana tungtang a Zo Innkuon pan thusun na; Tam thu pen Tonzang Zo Innkuon tangin keima Pu Thang Cin Lien in thu pulahna kang nei hi.
1.Tg Khup Deih Khuol ei kitha piehna tawh kisai in, kithana maimai hilo in tupna ngimna leh kithana lamdang tawh kithana ahiman in leitung zosia kiliinglawng ahiman in Zo Innkuon in tamthu kang pulah vuh ahihi. 2. Tammi kithana thu ang pien ciengin koimi koisa, koi phung koi be kicilo in ih panton ciet zieh in ko Zo Innkuon in ka dana vuh ang kiem zawdeuh hi. 3. Leitung kithanate sung ah migilo a kiciemte te nangawn zong, tam bang a kithana om ngailo in tutung ko ei kithana pen leitung ah kithana lah ah a sangpen(Sanchengtin) dingin ka ciemte vuh hi. 4. Ei kitha pieh dan pen a hinglaipi aa, a pasal van(zamaw) nangawn pen ei kisuhsiet pieh in a pumpi vante phuikim talo in ei kitenneen pieh a, Sievuon ten a pumpi a vel ciengin liemma sawmni val kimukhie a hizieh in cizat huoi kasa mama vuh aa, ka hlavuh a sia mama hi. 5. Tua ei kitha piehnate sung ah zong khatpa pen a kithat pa Tg Khup Deih Khuol pienna a pupi Man Lun te a hihi, adang khat pa zong innteh pa tute ahi, Mate Taithul na hi veve hi a dang nite zong mi namdang na hihetlo hi. Tam bang sisan kinai sanggam u le nau nu le pa sung ah tambang cizat huoi kithana ang pieh tah ciengin laizom melma kihita mawh ei ci’n ka lai vuh a na semsem hi 6. Tambang mulkim huoi cizat huoi kithana ang pien ciengin, tuol thatte lampan in ang vaikuon na vuh ka et cieng vun, Zo ngaina tahtah hi leh Pasal si luong tung ah Sielpi dinglai khat leh puonlai san khat tawh thu kipan ding ahihi. Hima leh ang kuondan vuh ka et cieng vun thu naupangin kimu hi. Tammi thu ah a neulua cia ka sanlo vuh hizawlo in, Sielpi, Sieltang le Zang a Siel kangpi ang kikeng zongin, kumpi thuguihlun(Law) in ei maisah thei tuonlo ding ahiman in, tupna tungtuong khat in kimu ahiman in kisanglo hizaw hi. 7. Tu laitah in mi pawlkhatte in Zo le Sim ci in minam khenna in mu vuh aa, khuo khat tui khat ih hina Tg Mang Khen Hau kibawlsiet tungin Pu B. Laang Cin Pau in kimtah in a pulahsa ahina dungzui in, tuni in zong khuo khat sung aa, a tenngton giehton tuinah khat dawnton ih hima bangin kithangpaih bawl lei koimapo a dingin hin gim hin gau nam tuonlo ding a hithu zong zong kang thei sah nuom vuh hi. 8. A hivang in, a beisa hun a, thusia piengteng tung ah ih kimaw maisah theina dungzui in Pasien leh kumpite tung ah ka vaiteng vuh ka ap vuh hi. Da luot man leh hlasiet luot man in kam hoilo tuomtuom a om khah leh kisansiem ciet vai.
Tammi thusunna tungtangin Zo le Sim a koimapo lungkim ciet hi.
Posted 29th July by pu zo